folclôr fol|clôr [CO]
- s.m. complès des tradizions tipichis di un popul, che daûr de idealizazion romantiche a son calcoladis origjinâls e ancestrâls, in contraposizion cu la culture alte, studiade, inteletuâl, creade: [Luigi Ciceri e Andreina Nicoloso] a rincurarin la publicazion di diviers volums di contis e di art popolâr, dongje de realizazion di mostris e di documentaris sul folclôr furlan (SFF, Premi "Andreina e Luigi Ciceri"); i yokai a son figuris tipichis dal folclôr gjaponês (Raffaele Serafini, Soreli jevât a mont)
- s.m. manifestazion carateristiche, ancje strambe o esagjerade in chê che e pretint di jessi spontanie e popolâr: jo no ven a dî messe par furlan par gust di dîle, par fâ folclôr. Nuie di dut chest. Il prin motîf sincîr al è chel chi. Il gno popul o vuei che si sinti rispietât (Francesc Placerean, Cuant che a un popul i gjavin la sô lenghe in glesie, al è pront par jessi soterât); a fasin lis garis tal esternâ la lôr religjon al limit dal folclôr e dal ridicul (Antoni Beline, I furlans e il templi)
- s.m. (fig., spres.) manifestazion o situazion che no je di cjapâ sul seri: il partît autonomist scozês al jere stât simpri considerât come un moviment che al domandave 100 par vê 10 [...]. Plui folclôr che sostance, insome (Simone Bressan, Alex Salmond, il moderât plui dûr dal fier)