democrazie /-ì-/ de|mo|cra|zi|e [FO]
- s.f. forme di guvier li che il podê al è tignût dal popul che al met in vore la sô sovranitât midiant di diviersis istituzions e soredut cul sisteme de elezion dai siei rapresentants: la democrazie liberâl madressude di chestis bandis tra il Sietcent e il Votcent, la democrazie parlamentâr fondade sul zûc dai partîts, no je nancje une mieze democrazie; e je a pene la sostituzion di une oligarchie instabile di «homines novi» tantis voltis sfurducjons, ambiziôs, furbos e cence scrupui, tal puest di une oligarchie stabile (Josef Marchet, …come che e diseve la gjate di Aquilee)
- s.f. stât tignût sù cun chê forme di guvier: lis democraziis a puedin distudâ une minorance nazionâl o reprimile propit doprant il dirit de maiorance nazionâl dominante (Adrian Cescje, Memoriis di politiche linguistiche)
- s.f. complès des fuarcis politichis che a crodin in chê forme di guvier, soredut in contraposizion cul autoritarisim: la prevalence di un partît o di chel altri, di une criche di diestre o di çampe, de democrazie o de reazion (Josef Marchet, Il fiar dal ciroic)
- s.f. dotrine politiche e sociâl fondade sul principi de sovranitât popolâr, su la garanzie de libertât e de paritât di ducj i citadins: il comun, entitât locâl autonome, al è l'ent che al rapresente la sô comunitât, indi cure i interès e indi promôf il disvilup, ispirantsi al principi di autonomie e ai valôrs di democrazie, solidarietât e convivence civîl (Aministrazion Publiche, Statût dal Comun di Udin)
- s.f. (fig.) situazion di justizie e rispiet dai dirits di ducj, ancje cu la specificazion di un ciert setôr: il nivel di democrazie di un Paîs si misure dal mût che a vegnin tratadis lis minorancis (Marc Stolf, Masse planc e cence plans. L'ûs public de lenghe furlane); reclamazions di democrazie educative ae don Milani (Adrian Cescje, Memoriis di politiche linguistiche); a condividevin la cussience che in Friûl no fos democrazie informative e che si veve di movisi par cambiâ lis robis (Max Mauro, Un Friûl difarent: i 90 mhz di Onde Furlane)