Dizionari de Lenghe Furlane

damascât  da|mas|cât  [CO, TS]

1. adi. tess. di tiessût o di ogjet fat di tiessût, lavorât come il damasc, cun dissens che a vegnin fûr dal contrast tal rifleti la lûs de trame e de ordidure:  si strucjà ancjemò di bevi, stranfant cualchi gote su la tavuaie blancje damascade (Franco Marchetta, Achì no ai viodût une pavee)
   
   1. di vistît, fat di damasc o di tiessût lavorât come il damasc:  il capelan dal ospedâl al scomence a dî messe: alt, sutîl, calm, tal candôr de sô vieste e de planete damascade orlade di spighetis di aur (Osiride Secco dai Juris, Une messe)
2. adi. che al à furniments di damasc, di sede lavorade in maniere di vê dissens formâts de diference di riflès tra trame e ordidure:  te glesie lustre di paviments, damascade di ros, inceade di lusôrs e colme di int (Domeni Zannier, La crete che no vai)