Dizionari de Lenghe Furlane

contentâsi  con|ten|tâ|si  [FO]

1. v.pron.intr. jessi content, sodisfat:  si contentaiso di vêmi par zinar? (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
2. v.pron.intr. adatâsi a jessi content di pôc o di alc di mancul di ce che si volarès:  Eliseo si contentave di vêi fat il lavôr par nuie se lui i dave une man a cjatâ une cjamare e une vore (Carlo Sgorlon, Prime di sere); i nestris a son mandâts sù de int par fâ i interès dal partît e dal stât e par insegnâi a la int a stâ buine, a contentâsi, a sacrificâsi pal ben superiôr (Antoni Beline, La eterne lote dai furlans)
3. v.pron.intr. limitâsi a fâ alc di sempliç, no complet, no profont e v.i.:  il Parlament european al veve cussì dome di contentâsi di proferî a guviers e Comission europeane "invîts" a che a metessin in vore i contignûts de Cjarte (Marc Stolf, La Cjarte di Strasburc dal 1981. Une Risoluzion "storiche" e ancjemò di atualitât)

Proverbis:

• contentâsi dal fat so e gjoldi plui che si po
• cuant che no si po vendemâ, si scuen contentâsi di rascjetâ
• cui che no si contente dal onest al piert ancje il rest
• cui che no si contente dal pôc al piert il trop
• cui che si contente al è un siôr
• cui che si contente al gjolt
• ognidun al è siôr se al sa contentâsi dal so stât
• si scuen contentâsi di ce che al da il covent
• si scuen contentâsi di ce che si à
• simpri al stente cui che no si contente