complementâr com|ple|men|târ [CO]
- adi. che al complemente, che al complete o ancje cun sens mutuâl, che si complete cuntun altri element: e alore, no si puedial voltâsi di chê altre bande, indulà che la produzion e je diferente e par solit complementâr de nestre, indulà che di grandis citâts industriâls no 'ndi è o che a son une vore lontanis? (Josef Marchet, Voltâsi ator); "Une ultime batude: miôr il furlan o l'inglês?" "No son lenghis alternativis ma complementârs, par tant a van ben dutis dôs" (Christian Romanin, "Un pas indenant viers la tutele")
- adi. [TS] gjeom. di angul, che zontât cuntun altri al rive ae sume di 90 grâts
- adi. [TS] mat. di un sotinsiemi, che nol à nissun element in comun cuntun altri sotinsiemi, intant che la sume dai elements dai doi sotinsiemis e corispuint al insiemi
- adi., s.f. [TS] scol., stor. tal ordenament scolastic dai prins dal Nûfcent, trieni di scuele dopo de istruzion elementâr: «Fâstu la prime complementâr?» «No. La seconde». Al frut i vignive dibot di ridi parcè che Eliseo al veve clamât complementârs lis scuelis mediis (Carlo Sgorlon, Prime di sere)
- adi. [TS] scol. di materie, che e complete la istruzion ma che si calcole in plui rispiet aes materiis fondamentâls e obligatoriis e che in gjenar e je facoltative o sielzude a discrezion de singule scuele o universitât: cul an academic 1968-1969, te Facoltât di lenghis e leteraduris forestis si scomençà a insegnâ, come materie complementâr, "Lenghe Ladine" (Giovanni Frau, In vore la universitât dal gnûf milenari)
- adi. di contribût, soredut pensionistic o assicuratîf, che si paie in plui rispiet a ce che e je la sume di base, daûr des esigjencis o des volontâts individuâls: i timps si scurtin cu la assicurazion sanitarie complementâr (Janez Erat, Il sisteme de sanitât in Austrie)