Dizionari de Lenghe Furlane

colonizâ  co|lo|ni|zâ  [CO]

1. v.tr. fondâ une colonie, mandâ une part di une comunitât a fondâ un gnûf insediament che al reste leât di ciertis relazions cu la patrie origjinarie:  i grêcs e i fenicis a colonizarin plui sîts su lis rivis dal Mediterani
2. v.tr. trasformâ un teritori in colonie, dâi a un teritori un status di dipendence di un altri paîs dominant:  intai ultins secui lis tieris inuit a son stadis colonizadis dal Ocident european (Fabian Ros, E la Groenlande e tacà a sunâ te sô lenghe)
   
   1. ridusi une popolazion intune cundizion di sotanance:  a àn scugnût imparâ une seconde lenghe parcè che a son stâts colonizâts (Franc Fari, Il cjâf dai furlans)
   2. (fig., iperb.) meti un paîs o une comunitâts intun stât di dipendence e subordenazion economiche, culturâl, di costum e v.i.:  in chê volte che i americans nus àn judâts a diliberâsi dal jôf dal nazisim e che nus àn colonizâts cun coca-cola, Marlboro e Marylin Monroe (Cristina Noacco, Faliscjis)
3. v.tr. ancje di animâi, plantis e altris organisims, slargjâsi intun spazi gnûf:  [la plante de vît] e je partide dal Caucas, li che si è formade, e e à colonizât l'Orient di mieç, la Europe e il bacin dal Mediterani (Enrico Peterlunger, Lis varietâts di vît resistentis a lis malatiis)