cartuline
/-ì-/
car|tu|li|ne
[AF]
-
s.f.
toc di cartoncin retangolâr doprât pe pueste, cuntune figure o une fotografie di une bande:
la frute e veve fat fente di nie, ma si acanive a cjalâsi une cartuline di Napoli cul mâr, i pins a ombrene e il Vesuvi cul penac di fum, pensant magari che la Italie e fos dute cussì (Alan Brusini, Come tai romançs);
no je gambiade che di pôc, chê frutute plene di vizis. […] Parcè colio simpri te tentazion di telefonâi, di fâmi vîf, di scrivii cartulinis? (Checo Tam, Queen Anastasia)
Var. cartoline
-
(fig.)
imagjin idiliche, dispès idealizade e stereotipade:
la Tersadie di schene e mostre il so cjapiel blanc, la valade e slargje i siei braçs: une cartuline che e pas il voli e che ti gjave il flât… ma il vivi intun paîs di mont nol è dome chest (Marta Vezzi, Il vivi intun paîs di mont);
in chel moment, nol veve voie di pensâ ai intrics, par no ruvinâ l'incjant di chê cartuline che al veve stampade tal cjâf (Franca Mainardis, Il sium di Lissandri)
-
fotografie su cartoncin, ancje se no di mandâ par pueste:
Rita e jere daûr a cjalâ une fotografie, e le mostrà ancje a lui. Te cartuline, dongje di jê, al jere un om plui alt di mieze cuarte (Carlo Sgorlon, Prime di sere)
-
s.f.
biliet di pueste, ancje cence imagjins:
Chei che a jerin restâts in patrie a ricevevin informazions par mieç di chês cartulinis puestâls di colôr celest; a jerin a miârs e a invadevin lis cjasis dai familiârs; lis cartulinis a vevin stampât la scrite ESENTE DA TASSA PER L'ITALIA E SVE COLONIE (Checo Tam, La vuere di Checo);
il Coordenament al vûl rivâ a la revision processuâl e riabilitazion e al à inviade une altre campagne di sensibilizazion, invidant a mandâ 5000 cartulinis a Rome (Antoni Beline, Par un 4 di Novembar di obiezion morâl, cence celebrazions e retoriche)
-
biliet di pueste par comunicazions uficiâls, soredut cul ordin di presentâsi par fâ il soldât:
e je reclamade la mê classe, îr di sere mi àn puartât la cartuline rosse i carabinîrs: usgnot al plui tart o devi cjapâ il treno par lâ a imbarcjâmi cul mio reziment (Pieri Somede dai Marcs, Vilie di Nadâl (teatri));
viers la biele stagjon dal '43, ur rivà la cartuline di presentâsi a Glemone, al comant de milizie (Alan Brusini, Chei di Cjasarse)