Dizionari de Lenghe Furlane

c  c  [FO, TS]

1. s.m. tierce letare dal alfabet, che il so non al è "ci'" o "ce":  ogni colone e ven segnade cuntune letare: a, b, c, d, e, f, g, h di çampe a drete (Nilde Teresa Negro, Zuìn di scacs); la grafie no je chê uficiâl ma ben chê di Zorç Faggin, li che si doprin ancje lis pipis su lis letaris "c", "g" e "s" (vâl a dî "č", "ğ", "š") (Alessio Potocco, I 80 agns di Marijan Brecelj, sloven studiôs dal furlan)
   
   1. adi.inv. intune serie, al pues contrassegnâ il tierç element:  cumò [l'implant liturgjic] al è spartît in 3 agns, A, B, C, cun 3 leturis par fieste, parcè che e je stade zontade la leture dal Gnûf Testament (Antoni Beline, Une lum pal nestri troi)
2. s.m., adi.num. te numerazion romane, simbul dal numar cent:  fo mandât imbassadô ad Udin cun III cjavalj là di missêr lu gardenâl per fâ uno protestazion soro lu fat delj C ducâts chi el debo dâ (Çan di Zuan di Cividât, Cuader dal cjamerâr Çan di Cividât)
3. sigle [TS] fis., sient. simbul di plui valôrs o grandecis
   
   1. maiuscul, simbul de scjale di misurazion de temperadure in grâts centigrats:  i reatôrs a lavorin ae temperadure di 286° C e ae pression di 6930 kPa (Alessandro Pascolini, Il disastri de centrâl nucleâr di Fukushima Dai-ichi)
   2. simbul dal calôr specific
   3. simbul de condusibilitât
   4. simbul de velocitât de lûs

Proverbis:

• i trê “c” pericolôs: cugnât, copari, cusìn