bacan1  /-àn/  ba|can  [CO]

  1. s.m., adi. contadin che al è paron dal so cjasâl e des sôs tieris, che al sta ben di bêçs:  so pari al è un bacan passût che salacor nol sa nancje cetante robe che al à tal soreli (Josef Marchet, Lis predicjis dal muini); al jere deventât un bolpat, un bacan. Parfin une cjase scuasi di siôrs al veve comprade intal borc (Pieri Menis, Il forest); i plaseve la Bete, un sclop di fantate che no 'nd jere une altre in Friûl, di famee timorade e bacane: cjamps, vacjis... (Meni Ucel, Rosaris)
    Sin. paur , bolpat
  2. adi., s.m. che, cui che al è plen di supierbie:  chel fregul di sostance che al veve al sarès lât dividût tra une sdrume di nevôts ignorants, triscj e bacans che no viodevin la ore che al tiràs il pît (Pieri Somede dai Marcs, Dure leç); i paisans ancje lôr simpri chei, ancjemò cun chel mût di resonâ sglonfât de retoriche bacane des lôr fameis, di une presunzion cence confins (Alan Brusini, La ultime partence)