alpin
/-ì-/
al|pin
[FO]
-
adi.
des Alps o des monts in gjenerâl:
une edilizie pal plui pôc rispietose dal paisaç alpin (Marc Stolf, Viaç in Europe - Ocitanie);
il procès di formazion de cjadene alpine al è stât produsût dal scuintrâsi tra il continent Afroarabic e chel Euroasiatic (Francesco Gobbo, Gjeologjie e paleontologjie ator di Preon);
lis miliziis de Cjargne e chês des valadis slovenis dal Friûl che a jerin impleadis dome a nivel locâl pe difese dai pas alpins (Carli Pup, Il Friûl de Joibe Grasse dal 1511)
-
s.m.
[TS]
milit.
tal pl., cuarp militâr talian di montagne:
une compagnie sielte di soldâts furlans dal bataion alpins "Cividât" si movè in anticip par cjapà la mont Natpriciar, denant Tulmin (Checo Tam, Just, cence di);
al à fate, tai alpins de Julie, la Grecie e la Russie, campagnis tremendis (Ivano Urli, Il conducente)
-
soldât di chel cuarp:
l'ultin fi di 'Sefut lu vevin fat alpin (Alan Brusini, Amîs come prime);
e sclopà la vuere, e lui, alpin, al è stât un dai prins a rivâ sul Mont Ros - ros di sanc -, su chê montagne maladete che e gloteve alpins come un drago simpri plen di fan e mai passût (Pieri Menis, Tinut di Libro)
Sin. pene nere
-
adi.
di chel cuarp militâr, formât di soldâts di chel cuarp:
la compagnie alpine che e ocupave la ponte dal mont Celon, […] ai 25 di Jugn si jere refudade di tornâ fûr de postazion, considerant che e sarès stade une stragje spaventose (Angelo Floramo, 1914-2014 Cuintristorie de Grande Vuere)
